Brot úr takkarorðunum hjá skúlastjóranum:
Fyrst tøkk fyri heiðurin. Tað gleðir og fløvar veruliga at fáa slíka viðurkenning. Tað kveikir og eggjar til framhald.
Vit, sum starva innan skúlaverkið, hava tann
framíhjárætt, at vit arbeiða við børnum og ungum og royna á besta hátt at
fyrireika og tilbúgva tey at møta framtíðini. Tí er arbeiði okkara so ómetaliga
spennandi og týdningarmikið.
Eingin leiðsla uttan starvsfólk, og eingin
góð leiðsla uttan góð starvsfólk. Vit í Kommunuskúlanum eru ríkað við sera
dugnaligum starvsfólki, og eg taki tignarliga heitið, mær er givið í dag, sum
eina sømd og viðurkenning av okkum øllum í Tórshavnar Kommunuskúla, starvsfólki
og næmingum okkara.
Somuleiðis eri eg sera glaður fyri, at
eyguni verða vend ímóti fólkaskúlanum á jaligan hátt, vónandi kann hetta vera
við til at leggja eina torvu av jaligum hugburði undir tann loga, sum
fólkaskúlin er eisini í okkara samfelagi.
Enn eina ferð hjartans tøkk fyri heiðurin!
