Mánaðarbræv – oktober

Hetta er triðja mánaðarbrævið, tit fáa í ár.

Eins og hini kunnandi skrivini, tit fáa av almennum týdningini viðvíkjandi skúlaganginum hjá tygara barni, verður eisini hetta brævið at finna á heimasíðuni hjá flokkinum.

Hetta brævið fer tó einamest at snúgva seg um Prag ferðina.

Undan fráferðini

Nú øll gjøld eru goldin eru bert seinastu snøklarnir at fáa upp á pláss, áðrenn klárt er hjá okkum at fara longu spennandi menningarferðina niður í tað søguliga Evropa.

Áminningarlisti:

• Galdandi pass og ferðatrygging má vera í lagi ... tú sleppur ikki umborð uttan L
• Um tú ikki hevur gjaldskort við (VISA Elektron ella líknandi), so kunnu vit lærarar ansa eftir lummapengunum hjá tær, um tú hevur koyrt teir í brævbjálvar, sum eru merktir bæði við navni og degi! (Dømi: Grettir – mánadag; Grettir – týsdag ... osfr.)
• Danskir pengar kunnu lættliga vekslast niðri í Kekkia; men tað er snilt at hava nakrar Evrur við, so tú hevur eitt sindur at brúka í Týsklandi.
• Hav heit klæði við, tí nú eru vit komin út í november, og tá kann tað væl vera kalt niðri í Evropa (brrrr); og minst til at hava skógvar, sum eru góðir at ganga í J
• Eftirsum tú býrt í kamari saman við øðrum á ferðini, mást tú syrgja fyri at hava skiftiklæði og tilfar til persónliga reingerð við tær (tannbust, sjampo, handklæði og líknandi).
• Sjálv ferðin er nokkso drúgv, og tí er snilt hjá tær at hava okkurt við at stytta tær stundir við, t.d. eina bók at hava í bussinum, og møguliga eitt kortspæl ella líknandi at hava umborð á Norrønu; men sjálvandi kanst tú eisini hava tína ípoð við tær J
• Hóast bussurin er heitur, kann tað vera gott at hava eitt teppi at putta seg við, tá ið svøvnur kemur í eygað ...
• ... og um tú stúrir fyri at sigla, so kanst tú hava sjóverkstablettir við tær; ikki tí tær kunnu eisini keypast umborð ...
• Um tú velur at hava elektroniskar lutir av ymsum slag við tær á ferðini – har undir eisini telefon – hevur tú sjálv/ur alla ábyrgdina av at fáa lutirnar við heim aftur.
• Rúsdrekka og líknandi er bannað á ferðini!
• Skúlatelefon: 22 06 88 – um bráðfeingisboð eru at geva!

Vit lærarar hava telefon við; men tær eru ikki til hugnaprát.

Bergur (22 85 74) – Karin (59 90 73) – Petur (22 33 97)

Skráin

Hósdagur          3/11                    - vanlig skúlagongd fyrrapartin
                                          vit møta á Farstøðini 19.00
                                          HAVIÐ PASS og FERÐATRYGGINGSKORT við!!!
                                          Norrøna siglir kl. 21.00
Fríggjadagur    4/11                    - umborð
Leygardagur    5/11                    - umleið kl. 10.00 sleppa vit í land í Danmark, og fara beint í bussin
                                          út móti kvøldi koma vit til Berlin
Sunnudagur    6/11                    - býarútferð í Berlin v. ferðaleiðara, sum tosar danskt
                                          út á seinnapartin verður farið víðari til Kekkia
                                          út á kvøldið koma vit til hotellið og fáa nátturða
                                          “metro”-skeið J
Mánadagur      7/11                    - býarútferð í Prag v. ferðaleiðara, sum tosar danskt
                                          vitjan á Gula marknaðinum
Týsdagur           8/11                    . vitjan í Kutna Hora (v. døgurða)
Mikudagur       9/11                    - vitjan á Terezin;
                                          vitjan á Gula marknaðinum
Hósdagur          10/11                  - vitjan á listasavni;
                                          vitjan á tøkni- og vísindasavni
Fríggjadagur    11/11                  - bussurin verður pakkaður kl. 10.00
                                          kl. 12.00 – 16.30: SHOPPING!! SHOPPING!! SHOPPING!! SHOPPING!!
                                          silgt verður á ánni (v. buffet) kl. 17.30
                                          fráferð úr Praha uml. kl. 22.00
Leygardagur    12/11                  - tíðliga á morgni við danskt/týska markið;
                                          umleið á miðdegi verður farið umborð
Sunnudagur    13/11                  - umborð
Mánadagur      14/11                  - komið verður á Havnina tíliga á morgni;
                                          skúlafrídagur J

Hotellið

Hotellið vit búgva á í Prag eitur Brno Hotel.

http://www.hotels-of-prague.com/brno/brno_hotel_prague.htm

Brno Hotel er beint við metro-støðina “Krizikova”, ið er tvey steðgipláss frá Centrum.

Morgunmatin eta vit millum 7.00 og 8.30 – mikudagin tó millum 7.00 og 8.15!

Á hotellinum koma vit at búgva soleiðis:

Dreingirnir fáa trý 6-pers kømur og eitt 4-pers kamar.

Genturnar fáa tvey 6-pers kømur, eitt 5-pers kamar og tvey 3-pers kømur.

Júst sum við kamarsbýtinum umborð á Norrønu, eru tað lærararnir, ið hava avgerandi orðið, hvør svevur hvar.

Tit fáa kamarsbýtið umborð!

Bestu heilsanir: Bergur, Karin & Petur

Mánaðarbræv – september

Hetta er næsta mánaðarbrævið, tit fáa í ár.

Eins og hini kunnandi skrivini, tit fáa av almennum týdningini viðvíkjandi skúlaganginum hjá tygara barni, verður eisini hetta brævið at finna á heimasíðuni hjá flokkinum.

Foreldrafundurin

Allarfyrst vilja vit takka tykkum øllum fyri, at tit møttu so væl á foreldrafundinum mikukvøldið 21. sept. Vit halda tað var ein sera góður og gevandi fundur, og tað er okkara vón, at tit eisini eru nøgd við fundin.

Umframt at ganga gjøgnum ymsu lærugreinirnar og at greiða frá býtinum millum reyð og blá í “smærru” lærugreinunum (neyvari lýst í august brævinum), vóru eisini onnur evni viðgjørd á fundinum, áðrenn prátið fall inn á ta fyristandandi uttanlandsferðina. 

Smb. reglugerðini fyri skúlan skulu allir flokkar hava foreldraumboð, ið millum annað hava ta uppgávu at standa sum samskiparar millum foreldur og skúla, um ætlanin er at skipa fyri tiltøkum í flokkinum, sum fella uttanfyri vanliga skúlagongd.

Rósa Jacobsen (mamma Jákup Viljam) og Rakul Guðjónsson (mamma Sigrið og Guðrið) bjóðaðu seg fram og vórðu valdar til hesa uppgávuna.

Hans Jón (hans.jon.thomsen@skulin.fo) hevur umsitið flokskonto’ina hjá gamla a-flokkinum. Henda konto er nú í sambandi við uttanlandsferðina í november avtikin, og í hesum sambandi vil Hans Jón fegin hava kontonummarið hjá næmingum/foreldrum í gamla a-flokkinum, soleiðis at teir pengar, sum savnaðir vóru saman á loppumarknað o.ø. kunnu verða býttiir út.

Prag-ferðin

1sta oktober skulu tær 5.000,- krónurnar ferðin kostar vera goldnar!

Annars fáa tit eitt meiri útføriligt bræv við upplýsingum og kunning um uttannlandsferðina eftir heystferiuna, men tó er sumt í hesum sambandi, sum ikki rættiliga kann bíða!

1)      Pass – tit mugu í tøkum tíma tryggja tykkum, at næmingurin hevur galdandi pass.
        Kjakið um reyð ella grøn pass er í roynd og veru bert akademiskt í hesum føri; bæði rigga   
        væl við tær marknagrindir, vit skulu um: Ta donsku, ta týsku og ta kekkisku!

2)      Ferðatrygging – tit mugu útvega tykkum galdandi ferðatrygging.
        Tað er ymiskt, hvussu tær ymsu familjutryggingarnar eru innrættaðar, men tryggingar-
        feløgini plaga at útvega skúlanæmingum eitt blátt kort, ið skal eitast at vera galdandi í
        øllum Schengen økinum.
        Um kortið er blátt ella ikki er sum so ikki so spennandi; tað hevur tó týdning, at tit hava
        hesi viðurskiftini í lagi, soleiðis at vit fáa sæð tað, áðrenn farið verður umborð
        hóskvøldið 3. november.

3)      Viðvíkjandi pengum siga royndir okkara, at tað snildasta hjá foreldrunum er at geva næmingunum eitt VISAelektron- ella Mastercard- kort við á ferðini; men takið eitt kopi av kortnummari og kontrollsiffrum, so tit eru trygg, um kortið skuldi blivið burtur!

Vitanetið

Á fundinum fingu øll foreldur av nýggjum útflíggjað kotur til Vitanetið, fyri at vit soleiðis kunnu fáa vissu um, at allr næmingarnir hjá okkum – og avvarandi teirra – hava atgongd.

Tað hevur tó víst seg, at fleiri – eisini í øðrum av skúlans flokkum – hava trupulleikar at sleppa inn á síðuna, og í tí sambandi hava vit fingið hetta bræv frá teimum á Elektron, ið varða av Vitanetinum:

Hey tit

Kanska riggar Vitanet ikki í Internet Explorer hjá onkrum. Orsøkin er, at vit hava økt um trygdina í Vitanet.

Við at fara inn undir Options, Advanced í Internet Explorer og setur flugubein í “Use TLS 1.0”, so skuldi tað rigga.

Kanska kunnu tit leggja hetta á heimasíðuna?

Vinarliga / Kind regards
ELEKTRON                                                                                                  (Prentsmiðjan vísir á J)

Vónandi ger hetta, at tað nú ber til hjá øllum at koma inn á Vitanetið.

Starvsvenjing og takkarbrøv

Í samband við starvsvenjingina hava næmingarnir skrivað takkarbrøv til praktikkplássini.

Vit lærarar hava verið og vitjað á teimum støðum, har tað bar okkum til at fara, og tað er altíð hugaligt at koma út á arbeiðsplássini og hoyra, hvussu raskur og hugagóður okkara skúlaungdómur er.

Talent-tímar

Í ár hava skúlastjórarnir á skúlaleiðarafundi gjørt av, at teir bókliga sterkastu næmingarnir í frá-faringarflokkunum eiga at fáa fakligar avbjóðingar, sum menna og stimbra evni teirra at loysa akademiskar uppgávur av málsligum, logiskum og støddfrøðisligum slag, ið eru á hægri støði enn vanligt er í fólkaskúlanum.

Henda undirvísing liggur uttanfyri vanliga skúlatíð og er sjálvboðin. Næmingarnir sluppu at melda seg til eftir áhuga; men tó varð gjørt teimum greitt, at hetta tilboð skal takast seriøst, soleiðis at skilja, at hevur tú meldað til, bindir tú teg at møta til tímarnar.

Á Kommunuskúlanum hava vit fingið 2 ferðir 10 dupult-tímar til hetta. Hesir tímarnir eru deildir soleiðis millum flokkarnar, at 9á hevur dupult-tíma mánadag frá 13³⁰ til 15⁰⁰

Pláss er fyri umleið 15 úr 9á í Talent-flokkinum!

9c og 9d fáa sama tilboð ... og koma teirra tímar eisini at liggja uttanfyri vanliga skúlatíð.

Lærari: Regin Marnersson.

Kalendari

Við hesum brævi fáa tit útflýggjaðan kalendaran fyri skúlaárið.

Kalendarin vísir frídagar, royndir og ikki minst tær óregluligu innlatingarnar; tvs. til ber at kaga í hann, um ivi stingur seg upp, hvørt tað er í hesari vikuni ella næstu, at enskur stílur skal latast inn ... tað er í næstu viku, men tað fáa tit nærri boð um fríggjadagin J

Vónandi lættir kalendarin um.
Eftir ætlan kemur hann á heimasíðuna fyrsta dagin.

Telefonlisti
Eisini fáa tit saman við hesum brævi útflýggjaðan telefonlistan fyri flokkin.

Verkætlanin

Vit skulu minna á, at tað er snilt at hava funnið sær yvirskipaða verkevnið nakað skjótt.
Minnist til at spyrja tykkum sjálvi: Hví er hetta evnið vit ætla okkum at viðgera, áhugavert?
(Vita tit ikki sjálvi í bólkinum, hví tað er áhugavert, er ringt at sannføra onnur, sjannheit J )

Rennidagur og heystferia

Árligi rennidagurin verður komandi fríggjadag (7/10) – Í tí sambandi møta vit á Argjaskúla, haðani runnið verður. Eftir renningina er heystferia. Skúlin byrjar aftur mánadagin 17/10.

                                                                                                          Bergur og Karin

Hetta er fyrsta mánaðarbrævið, tit fáa í ár.
Tað er meiningin at koma regluliga við kunnandi skrivum sum hesum, har greitt verður frá tí, sum fer fram í skúlanum, ið kann knýtast at skúlaganginum hjá næmingunum í 9á, sum er almenna heitið á samanlagda flokkinum, har barn tygara gongur.

Hetta bræv verður sjálvandi eisini lagt út á heimasíðuna, júst sum annað kunnandi tilfar av felagsáhuga.

Hølini

Tað er alment kunnugt, at høvuðsbygningurin í Kommunuskúlanum er stongdur og øll undirvísing flutt burtur úr honum; vit í 9. flokki eru farin at halda til yviri í fyribilshølunum – eisini nevnd barakkirnar – sum standa beint við Sjónleikarahúsið. Í teimum hølum verða so teir flestu tímarnir lisnir. Lærugreinirnar Alis- og Evnafrøði og Ítróttur eru tó undantiknar hesi meginreglu.

Nýggj teldustova er sett upp á loftinum í Realskúlanum, soleiðis at næmingar okkara framvegis hava frálíkar KT-umstøður til skúlaarbeiðið. Nýggja teldustovan verður tikin í nýtslu nú í vikuni.

Lærararnir

Í flokstoyminum í ár eru vit aftur tríggir lærarar:                    
Karin Lange (KL); Bergur Rasmussen (BR) og Oddfríður Rasmussen (OR)

Tað eru lærararnir í flokstoyminum, sum taka sær av flokslærara uppgávum, samskipa verkætlanar-arbeiði og líknandi.

Aðrir lærarar, flokkurin hevur eru:
Harriet Vágadal (HV); Malan Larsen (ML); Elin Djurhuus (EL); Jón Kragesteen (JK); Herborg Mikkelsen (HM) og Petur Veihe (PV)

Lærugreinir og tímatalva

Næmingarnir fingu tímatalvu, tá ið skúlaárið byrjaði.  Hon liggur á floksheimasíðuni.
Lærarar og lærugreinir flokkurin hevur í ár eru:

Flokslærarar, Støddfrøði og Enskt:  KL og BR
Føroyskt:                                          BR og OR
Danskt:                                            OR og HV
Týskt:                                               EL(a) og JK (b)
Søga og Alis- og Evnafrøði:             BR
Landalæra:                                      KL
Kristni:                                             OR
Lívfrøði:                                           ML
Ítróttur:                                            HM (gentur) og PV (dreingir)

Alis- og Evnafrøðin er á gamla Argja skúla; Ítrótturin skiftir millum Argja skúla og onnur støð í býnum.

Alis- og evnafrøði

Í ár verða tímarnir í Alis- og Evnafrøði lisnir á Argja skúla. Upprunaliga var tímatalvan løgd soleiðis, at vit sluppu út hagar mánadag og mikudag; og av tí vallærugreinin týskt, sum øll ikki hava, er beint eftir døgurða mánadag, valdu vit at skipa floksbýtið í Alis- og Evnafrøði út frá hesum, so eingin skuldi vera noyddur at hava frítímar á tímatalvuni.

Men síðani næmingarnir fingu hetta mánaðarbrævið, eru broytingar farnar fram í tímatalvuni, soleiðis at Alis- og Evnafrøðin er flutt frá mánadegi í 7. og 8. tíma til hósadag í 7. og 8. tíma.

Enskt-tímarnir, sum vóru í 7. og 8. tíma hósdag eru samsvarandi broytingini fluttir til 5. og 6. tíma fríggjadag.

Soleiðis verður hereftir møtt í Alis- og Evnafrøði:  

“Mikudagsflokkurin”
Aleksandur – Andrias – Bogi – David – Guðrið – Hansina – Jákup Viljam – Jón – Maria – Martin – Niklas – Njál – Pauli – Pernille – Rasmus – Rebekka – Sanna – Sigrið G – William

“Hósdagsflokkurin”
Anna Louisa – Ari – Bára – Barbara – Bergtóra – Bjørk – Embla – Fía – Hanna – Hanus – Heidi – Jákup – Kristina – Magnus – Ólavur – Pætur – Petur Pauli – Sigrið P – Silja – Steingrímur

Blá og reyð:

Vit hava valt at skifta næmingarnar í bláan og reyðan bólk í “smærru” lærugreinunum Landalæru, Søgu, Kristni og Lívfrøði.
Hetta er gjørt fyri at styrkja samansjóvingina av næmingunum tvørtur um gomlu floksmørkini; men eisini fyri gera innlæringsumstøðurnar so góðar sum til ber, tí tað er ein sannroynd at summi læra best um morgunin og onnur út á dagin, og á henda hátt gongur tað ikki altíð út yvir somu lærugrein, at lyndið í okkum øllum somlum hesum viðvíkjandi er ymiskt.
Litaðu bólkarnir, sum byrjaðu í farnu viku, halda fram til heystferiuna; eftir hestferiuna verða bólkarnir skipaðir av nýggjum, og vara teir tá fram til jólar. Eftir nýggjár skifta bólkarnir aftur og vara teir tá út móti føstuni, og tá verður seinasta skiftið, ið varir fram til páskir.

Heilsusysturin

Heilsusysturin – Bjørghild Djurhuus – hevur í dag kunnað næmingarnar um virksemi sítt.Vit hava eina skipan, har heilsusysturin á hvørjum ári hevur eina samrøðu við hvønn einstakan næming. Á heimasíðu skúlans stendur nærri útgreinað, nær tað annars ber til at koma til viðtal hjá henni.

Skúlavegleiðarin

Vit hava fingið nýggjan skúlavegleiðara í ár, og hevur hann – Jón Kragesteen – í dag kunnað næmingarnar bæði um virksemi sítt og um starvsvenjingna, sum verður í viku 36 og 37.Vit hava eina skipan, har skúlavegleiðarin á hvørjum ári hevur eina samrøðu við hvønn einstakan næming.Á heimasíðu skúlans stendur nærri útgreinað, nær tað annars ber til at koma til viðtal hjá honum.

Uttanlandsferðin: Prag

Fyrireikingin av ferðini í november er nú komin so væl áleiðis, at vit á foreldrafundinum í september kunnu ganga ígjøgnum hava í smálutum.Lærarar á ferðini vera:                                     Bergur; Karin og Petur

Foreldrafundur í september

Mikudagin 21. september kl. 18.00 verður felags foreldrafundur, og tá verður ársætlanin gjøgnumgingin í størri mun og kunnað verður eisini nærri um uttanlandsferðina.

Við vón um gott, mennandi og spennandi samstarv
Bergur og Karin